Hai uns meses que decidimos non dar máis concertos e adicar o noso -escaso, por desgraza- tempo de lecer a facer nova música. Niso andamos e xa temos rematada e entregada a peza que fixemos para a banda sonora de Xogo de Nenos, a nova curtametraxe de Pachi Baranda. El en troques fíxonos un videoclip para Toda esa enerxía escura con imaxes do seu arquivo de Super 8, é o que podedes ver encabezando esta entrada.
Soubemos ademais que imos aparecer nun libro escrito por Fernando Fernández Rego adicado ao Pop galego que vai sair esta primavera editado por Toxosoutos. Levará biografías e discografías comentadas de máis de 60 bandas e solistas galegos das catro últimas décadas xunto con artigos de sinaturas convidadas e unha escolma da escena actual en CD. Un libro moi necesario no que por suposto estamos encantados de aparecer.
Tamen está case pronto un novo tema que irá incluido no compilatorio República Billarda, un disco en apoio ao noso deporte tradicional por excelencia. A letra está baseada nun texto de Lara Dopazo -que repite tras engaiolarnos co de Píntamas de escuro- e leva por título Lipilape, o nome que lle dan á billarda en Marín, a súa vila natal: